點讀專訪｜東張女神吳幸美無懼老鼠曱甴，樂做「小主持」幫助小市民

曾經親身試飲「斷片酒」、追訪過垃圾屋屋主，吳幸美 (Amy) 入行 20 年，被不少網民惡搞改圖、熱烈討論過；去年參與配音節目，評判也說她「被老鼠曱甴耽誤了」，不過 Amy 卻樂於擔當「小主持」身份，更說自己已經圓夢了。

Amy 2003 年透過選美進入娛樂圈，踏上銀色旅途不少人或許期望擔正劇集、主持節目的機會，Amy 卻成為節目《東張西望》的採訪專員，經常深入社會不同角落，好人好事、惡人慘事她也採訪過不少。

東張女神遇老鼠曱甴頂硬上

不經不覺，Amy 加入《東張西望》已經第 15 個年頭，跟她同期的主持，有些已淡出幕前、有些已「上位」、甚或已轉會，Amy 說工作崗位使她有使命感，作為藝人很難得可在工作上幫助別人，試過出外景時，有街坊答謝她報導最新的詐騙技倆，「街坊話好彩睇咗節目，先知道依家有啲咁嘅呃人手法，因為啱啱真係有人打電話想呃佢，睇咗 (報導) 先無金錢損失！」

「當見到有啲人真係好徬徨無助，我哋可以透過一個節目，或者一個小小主持嘅能力，去令人哋解決咗件事，或者令人哋開心嘅，我都覺得係一個好感恩嘅工作機會。」

工作使她更「貼地」，有機會接觸社會上最新的話題事物，亦遇過不少奇人怪事，Amy 形容每天的工作都很難忘，但戶外採訪避免不了面對蛇蟲鼠蟻、屋邨噪音、街坊惡霸等事情，一個選美入行的女子，如何跨越心理關口？

她說：「我自己都係一個女仔嚟，去一啲比較多曱甴老鼠，或者比較污糟、危險嘅地方，任何人去都會有少少覺得『係我呀？』、『真係要我去？』，但當然工作派到嚟嘅時候，我都想做好佢，有陣時就硬住頭皮去做。」

主持以外勇於挑戰不同角色

Amy 的主持形象深入人心，在處境劇《愛回家》客串的角色也是「慌張西望吳幸美」，拍劇可以「做自己」令她喜出望外，「我覺得某程度上可能對我係好事嚟嘅…即係大家對我做主持嘅一個肯定同認同，覺得我做得都唔錯，先會比我做返嗰個崗位。」但作為藝人，會否擔心擺脫不了主持框框？Amy 形容自己無包袱，甚麼角色都願意做，「就算一個師奶嘅角色，或者做人阿媽嘅角色，我都會好好做好佢，當然呢個機會未嚟到，但如果嚟到嘅時候，我都會好好把握去做好佢。」

Amy 去年參加配音節目《好聲好戲》，一嘗當配音演員滋味，她聲演李佳芯 (Ali) 在劇集《智能愛人》的角色，獲評判一致讚賞，亦成為另一個代表作，有網民留言說感恩吳幸美的名字終於有人留意到。Amy 對於網民的留言及支持十分感動，「見到好多唔同嘅留言，都未能夠一一去回覆，但係在心中全部都好多謝佢哋，有一個幸運可以得到大家嘅眷顧，我自己都開心嘅。」

失落「最佳主持」卻喜獲觀眾掌聲

今年年初，Amy 與電視台慶頒奬禮的「最佳女主持」奬項擦身而過，不少網民替她感到不值，Amy 卻豁然地說：「我係抱住一個盡力做到最好嘅心態，無求任何嘅回報，至於你話有無得到獎唔緊要，最緊要就係得到大家掌聲，已經係最開心，我覺得得到人嘅認同，先至係最大嘅獎賞。」

在幕前經常為人伸張正義，Amy 說自己也是見義勇為的人，但性格就甚為怕醜，中學時因參與學生會要擔任司儀，她發現自己在台上自信滿滿，於是愛上擔任司儀，家人亦勸她要向主持方向好好發展，「我覺得司儀係可以做到七、八十歲，你係會愈嚟愈增值，經驗愈嚟愈豐富，會愈做愈好，演員有個限期，去到某個年紀，你都要接受一樣嘢，就係做一啲比較成熟嘅角色。」去年 Amy 成為TVB台慶司儀之一，原來這是她的夢想，「好希望可以做到一個司儀嘅工作，企上一個舞臺上面，喺一個大型嘅節目度做司儀。我已經覺得達成自己嘅目標，所以『吸引力法則』係得嘅！」

相信幸福美好的事情會發生

「吸引力法則」來自 Amy 一本很喜愛的書《秘密》(The Secret)，她特別向大家推介書中以下一段文字：

感覺美好真的很重要，因為它會發出訊號到宇宙中，然後吸引更多的美好回來，所以你愈能感覺美好，就會吸引愈多有助於你感覺美好，以及持續讓你更加振奮的事物。

Amy 回想自己過去 20 年，能堅持夢想走到今天，又能以積極正面態度應付不同工作挑戰，是來自這本書的力量，她勉勵大家要積極面對每天生活、相信美好的事情會發生。

「到依家 2023 年呢個時候，回想我之前寫低嘅目標，我發現全部都已經達成，好多謝呢本書，令我好樂觀好正面去做好我人生嘅每一個工作。」她特別向大家推介的那一段說話，亦繼續成為 Amy 走下去的動力，「暫時到呢刻為止，我都只係覺得自己係一個普通嘅小主持，同埋普通嘅小演員嚟嘅啫，你話有無想大紅大紫？我就從來無諗過，淨係諗住做好自己派到手頭上嘅工作。」

2023 年又快過了一半，大家年初有沒有甚麼目標？還有達成的、又會否像 Amy 般，相信它會發生？