分享文章

點讀專訪|無懼後浪,布志綸再推新歌用行動告訴大家:我一直都在!

近年樂壇新人輩出,電視台的選秀節目也各自誕生不少新星,令競爭愈來愈熾熱。自稱為「年齡夾心階層」的布志綸 (Alan) 在「後浪」推進下,繼五月推出的《飛鳥俠》成為四台冠軍歌後,旋即於七月底再推出新歌《爸爸好嘢 Little Boy》。一歌接一歌,有人形容布志綸「回歸」了,他卻想告訴大家:自己一直都在。

「香港就係咁樣,總之你隔了兩三個月、四個月唔出現,就當你 byebye 咗,然後你第五個月出首歌,哦,你回歸樂壇。我已經經歷過咁嘅處境......所以我咪好勤力即刻做咗兩首歌先,要連住,如果唔係真係唔掂。」Alan 苦笑說。

2017 年開始作獨立發展的 Alan ,五年間歷盡社會各種變化,疊加近三年疫情,單飛路一點也不易走。

「最開頭人人都會覺得係因為我要 solo 而無咗 Mr.,調轉晒嚟講,大家唔會理解樂隊當時出現咗咩問題,去到 2019 年做 Mr. 10 周年演唱會,就話比大家知有 show 都會做,之不過做歌就唔會同以前一樣,因為大家都唔得閒,人人也有各自的理想,無得夾 band 就唔會有作品。」

由他擔任主音的樂隊 Mr. 於2008 年出道時,樂壇風氣跟現在不同,Mr.  成績不錯,更先後四次上紅館開個唱。

現在去演唱會,歌手舉咪與全場大合唱幾乎是必備環節。Alan 說自己是上到紅館,方發現有些歌可以和樂迷合唱。但近年風氣有變,有些樂隊早在創作時已追求歌曲要有「大合唱」元素,「兩、三年前去睇新 band ,個個作首歌出嚟要有大合唱,唔理首歌係咪適合,總知就要『隊』個咪出嚟,覺得咁樣先係大 band 風格,我就了解大家都想要捷徑。」

我一個在途上 盡顯荒涼 --《飛鳥俠》

「疫情、後浪,令到專注力去晒最新嘅音樂人及歌手,突然間我們哋呢啲出道十幾年,唔長唔短嘅音樂人,好似突然間無咗個焦點同擺位,呢個就係吃力位。」

就像電影《飛鳥俠》內的主角,予人過氣感覺,連女兒也覺得他過時,但仍堅持著對戲劇的執著,填詞人梁栢堅知道 Alan 想唱出「年齡夾心階層」的唏噓,以及想盡做的心態,幫他填了這份詞,同時勉勵了自己,「再爆起來只因主角從無放棄,如果放棄咗就再無呢個機會。」

如今看見歲月無聲一切變化感嘆有一些 --《爸爸好嘢 Little Boy》

Alan 的兒子已經六歲,這些年多了爸爸這個角色,令 Alan 有感而發,新歌《爸爸好嘢 Little Boy》就延續這一份唏噓,用自身的經歷去訴說每個人都敵不過歲月的無情。「係咪同大家講堅持、唔好放棄就可以?我而家係,咁有天如果我放棄咗,係因為我已經堅持過我會咁樣諗。」

《爸爸好嘢 Little Boy》還有個彩蛋,Alan 歌迷應該留意到,歌詞呼應了他首支單飛作品《人在野》。《人在野》唱出他面對困難的心態,逆境中總會有人同行。

要怎經得起變化 把初心記掛 --《經得起變化》

這個年代,要走紅可以靠網絡,選秀節目亦捧紅不少新人。Alan 最近擔任了 TVB 新一季《聲夢傳奇》導師,面對十多歲的參賽者,Alan 覺得他們十分幸運。

除了能得到很多專業指導,「未有作品已經有人認識,唔駛捱十幾二十年,要諗作甚麼歌,紅咗先,所以佢哋無 excuse 唔努力。」

作為導師,他說自己不會太著重分析唱歌技巧,因為最重要是感情,「音樂係情感傳遞,點解會著迷於音樂,正正唔係因為佢解釋得到,而係因為情懷,感情係要去感受,多過去拆解。」 

最近兩次出歌,Alan 都先在網上發結他版 Acoustic version,再發放 Studio version,雖有瑕疵,但情感更為真摯。他亦重新 pick up 結他,「以前好一段時間我都唔洗我彈,我手汗係比較多,唔太適合彈結他......點都要自己進步,唔知大家睇唔睇到,但都要做。」

仍然在堅守 創我另一章 --《飛鳥俠》

四年前,Alan 推出作品《經得起變化》,快將入行 15 周年,歷經各種變化洗禮,他是否如歌詞所說「初心仍未變改」?

「我可以講,每一首 solo 作品,我無一首係 hea 做,全部都有要求,我追求首歌有畫面,有訊息,呢個係我自己對做音樂嘅要求」。

歌曲 hit 不 hit 得起,他說已不在乎,也沒追求一定要出碟,反而初心就是,繼續做好音樂,報答一直支持他的歌迷。

鳴謝
Makeup: Wendy Lee@Wendy's workshop 
Hair: Terry Yeung
Wardrobe: Styling by @syanleung; Wardrobe @portsv #portsv

相信,堅持,能成就我的小故事。

Success!

Thanks for subscribing.

Logo

訂閱電子資訊

您提供以下所需要的個人資料,即表示您已閱讀並同意《點讀》的《私隱政策聲明》及《個人資料收集聲明》,並同意 《點讀》使用您的個人資料以作訂閱《點讀》的電子資訊之相關用途。

如有需要,您亦可以隨時取消訂閱或修改您的個人資料。若有疑問,請電郵至 read@shkpreadingclub.com。

15

胡同裡的神祕客棧—黃鴻璽《夜奔》新書分享會

2:00pm-4:00pm

15

做自己的情緒管理師

5:00pm-6:00pm