點讀專訪｜夢想堅持雖然格外地難，葉巧琳以「打不死」精神繼續奮鬥

難道我還未夠難 每天生還已是極難  
不要 再重擊我 看我又如何的撐…

葉巧琳 (Mischa) 去年 11 月推出歌曲《難道我還未夠難》，歌詞原是唱出她多年來追夢的心路歷程，其後遇上第五波疫情，歌詞引起不少香港人共鳴。歌曲不但成為她出道以來首支三台冠軍作品，亦令更多人認識「葉巧琳」的名字。

Mischa 年中更獲張敬軒邀請擔任演唱會嘉賓，達成上紅館舞台演唱的心願。能遇上一首代表作，她十分感恩：「一首歌嘅好唔可以擔保以後條路會一路好，人生就係咁樣高高低低，呢首歌會成為一首，當我覺得人生唔如意嘅時候，會攞嚟當做能量、幫自己差電嘅一首歌。」

出道踏入第十個年頭，Mischa 推出過不少作品，但不少人認識她，是始於兩年前的《全民造星III》節目，甚至有人以為她是樂壇新人，實際上她參賽時已是 35 歲。回想低谷的日子，她說身邊曾有不少朋友勸她放棄追夢，「就算我身邊好 close 嘅朋友都同我講，你仲發咩夢？腳踏實地去搵錢啦！」

堅持，為夢想勇敢前行

但 Mischa 有著人馬座的性格，勇敢追夢、不懼困難，她說自己遇上甚麼打擊都能站起來：「好似有打不死嘅精神，唱歌呢樣嘢我好想做，如果唔唱歌我想像唔到，我一定要堅持落去！」

結果遇上《造星》比賽，她抱著「最後一試」心態參加，最終獲得第五名，亦有機會展示她紮實與感染力強的音樂劇唱功。

Mischa 在演藝學院修讀古典聲樂，跟流行曲唱法不同，因此初出道時曾對自己的唱腔感到困擾。參加《造星》比賽後，Mischa 知名度提升，獲得不少演出機會，包括參演音樂劇、主題樂園音樂會等，亦舉辦了首場個人音樂會，曾經認為是「絆腳石」的古典聲樂，最終為她帶來不少機會。

「對我嚟講係一樣以前我好想收埋、想撇甩嘅嘢，覺得嗰樣嘢唔應該存在，因為佢阻住我。以前未學識流行曲呢個世界係點運作，聲音應該點用，知道咗之後，我可以攞翻佢 (古典聲樂) 出嚟，兩者就可以並存。」

戰鬥，為人生努力奮鬥

Mischa 今年推出新的音樂企畫《The Odyssey of Freya》，以打機為主題探討人生，新歌《人間英靈》歌頌大家面對困境的打不死精神。

「我哋日常生活每日都喺度打緊仗，細胞打緊仗，我哋亦為咗自己生活打仗。首歌係想歌頌返我哋自己，只要我哋唔好放棄，只要肯堅持，個個都可以去到英靈殿。喺神話入面，你一定要係一個勇士，你先可以去到英靈殿，希望大家喺呢首歌搵到佢嘅力量，繼續努力做自己想做嘅嘢。」

在故事中 Mischa 化身成虛擬人物 Freya，與一群隊友打大佬，現實中她亦是個機迷，入讀演藝前更曾經因為迷失方向，一整年坐在家中打機做「廢青」。

今次能把嗜好「打機」融入自己的歌曲，她十分雀躍，「我打咗咁多年嘅機，有冇人會想像到我喺音樂上，真係可以將佢呈現出嚟，咁多人配合一齊去 FF(最終幻想)呢件事，我覺得已經…… 我都唔知有咩可以再突破，呢個咁大嘅 FF。」

未來，在音樂路上繼續FF

她形容今次音樂企畫是她人生最大 FF，甚至覺得能化 FF 成真，比頒獎禮奪獎意義更大。

「就算有獎無獎，我都係做咗我自己最想要嘅嘢...... 我可能已經睇化咗呢樣嘢，唔會去追，對我嚟講最大嘅禮物就係，首歌好多人聽咗，亦都俾到啲能量佢哋。」

現實中，Mischa 亦為自己人生、夢想奮鬥多年，她用歌曲勉勵有夢想的人。

活著縱是痛， 「仍然感激可以痛」，還要讚歎自己的英勇：「 追夢唔好怕辛苦，因為一定辛苦，你可能默默耕耘 10 年、20 年都未得到你想得到嘅嘢，我覺得一個人唔可以缺乏嘅嘢就係夢想，就係 hope，人生冇咗 hope 就前進唔到呀，所以緊記一定要有 hope，就算幾差嘅現況都好，一定會有光明嘅一日。」

鳴謝
Makeup: Cyrus Lee

Hair: Milk Chan @Xenter

Wardrobe: 
Dress @diesel #dieselhk
Shoes & acc @charleskeithofficial

Stylist: @danitorial